បច្ចុប្បន្នមានអាយុ៤១ឆ្នាំ និងមានអាស័យដ្ឋាននៅរាជធានីភ្នំពេញ។ ចាប់ផ្តើមប្រឡូកក្នុងអាជីពសារព័ត៌មាន ពីឆ្នាំ២០០០ ដោយសរសេររឿង នយោបាយ សេដ្ឋកិច្ច និងសង្គម។

បទពិសោធន៍ 

- ពីឆ្នាំ២០០០-២០០៣៖ ចូលបម្រើការងារនៅវិទ្យុជាតិ (FM.96)។ 

- ឆ្នាំ២០០៣-២០០៦៖ ចូលបម្រើការងារ នៅវិទ្យុសំឡេងប្រជាធិបតេយ្យ VOD ។

- ឆ្នាំ២០០៥៖ ធ្វើការងារក្រៅម៉ោង និងជាអ្នកឆ្លើយឆ្លងព័ត៌មានឲ្យវិទ្យុអូស្ត្រាលី SBS។

- ឆ្នាំ២០០៧-២០១៥៖ ចូលបម្រើការងារ នៅវិទ្យុបារាំងអន្តរជាតិ RFI។ 

- ឆ្នាំ២០១៥-បច្ចុប្បន្ន៖ ការីនិពន្ធ នៅសា្ថនីយទូរទស្សន៍ PNN ។

- ឆ្នាំ២០១៦-២០១៨៖ ធ្វើការក្រៅម៉ោង នៅវេបសាយដំណឹង «ខ្លីខ្លី» របស់ក្រុមហ៊ុនសប្បាយ, ធ្វើការក្រៅម៉ោងនៅវេបសាយដំណឹងទើបបើកថ្មី ឈ្មោះ «តោះអាន», ជាអ្នកសរសេរបទវិភាគនៅវេបសាយដំណឹង «Phnom Penh Reporter» និងធ្វើការក្រៅម៉ោងនៅកាសែតអនឡាយ Swift News ។ 

កម្រិតវប្បធម៌/វគ្គបណ្តុះបណ្តាលសារព័ត៌មាន

- ឆ្នាំ២០០០-២០០១៖ បានរៀននូវបណ្តុះបណ្តាលមូលដ្ឋានផ្នែកសារព័ត៌មាន នៅវិទ្យាស្ថានសារគមនាគមន៍កម្ពុជា(CCI) នៅក្រសួងព័ត៌មាន។ 

- ឆ្នាំ២០០៣៖ បញ្ចប់ថ្នាក់បរិញ្ញបត្រនៅសាកលវិទ្យាជាតិគ្រប់គ្រង ផ្នែកទេសចរណ៍។

- ឆ្នាំ២០០៥៖ បានចូលរួមវគ្គបណ្តុះបណ្តាលរបស់ស្ថានីយវិទ្យុមួយ ប្រទេសឥណ្ឌូនេស៊ី។

- ក្រោយមកទៀត លោក លី ម៉េងហួរ ក៏ទទួលបានវគ្គបណ្តុះបណ្តាលផ្នែករាយការណ៍ព័ត៌មាននានា នៅប្រទេសបារាំង ជប៉ុន និង ប្រទេសថៃ ជាដើម។ 

មូលហេតុប្រឡូកក្នុងវិស័យសារព័ត៌មាន

ជាភាពចៃដន្យមួយដែលលោក លី ម៉េងហួរ ចូលប្រឡូកការងារក្នុងវិស័យសារព័ត៌មាន បានក្នុងរយៈ ពេលជាង២០ឆ្នាំមកនេះ។ អំឡុងពេលឆ្នាំទីមួយនៃការសិក្សានៅសាកលវិទ្យាល័យនៅរាជធានីភ្នំពេញ តាមរយៈពេលមិត្តភក្តិរបស់ខ្លួន លោក លី ម៉េងហួរ បានទៅចូលលេងនៅវិទ្យុជាតិ(FM.96) ដែលមាន ទីតាំងនៅម្តុំស្ទឹងមានជ័យ។ បន្ទាប់ពីមានទំនាក់ទំនងល្អជាមួយអ្នកធ្វើការងារនៅវិទ្យុជាតិ ព្រមទាំងមាន ចំណងចំណូលចិត្តផ្នែកតែងនិពន្ធផងនោះ លោក បានស្នើសុំគេចូលបម្រើការងារជាបុគ្គលិកបណ្តែត នៅវិទ្យុជាតិ ដោយសរសេរអត្ថបទឬរឿង ដែលពាក់ព័ន្ធនឹងគោលនយោបាយអភិវឌ្ឍរបស់រដ្ឋាភិបាល និងរឿងសេដ្ឋកិច្ច នានា ជាដើម។ 

ស្នាដៃលេចធ្លោ 

- ឆ្នាំ២០០៧-២០១៥៖ រឿងពាក់ព័ន្ធនឹងបញ្ហាព្រំដែនរវាងប្រជាពលរដ្ឋរស់នៅខេត្តត្បូងឃ្មុំ ជាមួយអាជ្ញាធរប្រទេសវៀតណាម, ប្រភេទអត្ថបទបែបពិពណ៌នា ឬបទយកការណ៍ផ្សេងៗ។ 

ចែករំលែកបទពិសោធន៍ការងារ និងបណ្តុះបណ្តាល ការចូលរួមបណ្តុះបណ្តាលដល់អ្នកសារព័ត៌មាន តាមរយៈសិក្ខាសាលានានា គឺមិនដែលមានសម្រាប់ លោក លី ម៉េងហួរ ទេ។ ប៉ុន្តែលោក តែងតែចែក រំលែកបទពិសោធន៍ការងារដល់មិត្តភក្តិរួមអាជីព ជាពិសេសដល់អ្នកកាសែតដែលទើបចូលប្រឡូកការងារក្នុងវិស័យសារព័ត៌មាន បានច្រើននាក់ផងដែរ។ «ខ្ញុំបានបណ្តុះបណ្តាល និង ចែករំលែកនូវចំណេះ ជំនាញរបស់ខ្ញុំដល់អ្នកកាសែតដែលស្ថិតនៅក្រោម ការគ្រប់គ្រងខ្ញុំផ្ទាល់ ចាប់តាំងអំឡុងឆ្នាំ២០០៣ មកម្លេះ»។ 

ទស្សនៈស្តីពីស្ថានភាពសារព័ត៌មាន

អំឡុងឆ្នាំ២០០០ ការប្រមូលព័ត៌មានគឺមានភាពលំបាកច្រើនជាងសព្វថ្ងៃ ព្រោះតែមិនសូវមានមធ្យាបាយក្នុងការទទួលបានព័ត៌មាន។ បើតាមលោក លី ម៉េងហួរ ប្រភពពត៌មាននាអំឡុងឆ្នាំនោះ គឺពឹងផ្អែកច្រើនលើក្រសួងព័ត៌មាន និងចុះដល់ទីតាំងព្រឹត្តិការណ៍ផ្ទាល់ក្នុងប្រមូលព័ត៌មាន។ ប៉ុន្តែ បច្ចុប្បន្នដោយសារតែការវិវត្តនិងភាពជឿនលឿននៃបច្ចេកទេសវិទ្យាពីមួយឆ្នាំទៅមួយឆ្នាំ បានធ្វើឱ្យអ្នកសារព័ត៌មាននីមួយៗ មានមធ្យាបាយច្រើនក្នុងការស្វែងរកប្រភពនិងប្រមូលព័ត៌មានបានដោយភាពងាយស្រួលនិងរហ័ស តាមរយៈទូរសព្ទដៃ និងប្រព័ន្ធទំនាក់ទំនងសង្គមនានា ដើម្បីធ្វើសេចក្តីរាយការណ៍ ឬផ្សព្វផ្សាយ ដល់ប្រជាពលរដ្ឋ។

ទន្ទឹមនឹងការវិវត្តដ៏ល្អប្រសើរនៃវិស័យសារព័ត៌មាននៅកម្ពុជានាពេលបច្ចុប្បន្ន លោក លី ម៉េងហួរ ក៏ 

មើលឃើញពីការអនុវត្តដោយគ្មានវិជ្ជាជីវៈនិងក្រមសីលធម៌ របស់អ្នកសារព័ត៌មានមួយចំនួនដែល បានធ្វើសេចក្តីរាយការណ៍ ឬ Live តាមបណ្តាញសង្គមទំនាក់ទំនងហ្វេសប៊ុក ផងដែរ។ 

ជម្រើស

អាជីពជាអ្នកកាសែតជាង២០មកឆ្នាំនេះ បានចងចិត្ត លោក លី ម៉េងហួរ ឱ្យនៅតែមានឆន្ទៈ បន្តបំពេញ ការងារក្នុងវិស័យសារព័ត៌មានប្រកបដោយវិជ្ជាជីវៈ និងក្រមសីលធម៌ ដើម្បីចូលរួមអភិវឌ្ឍសង្គមជាតិ។ បុរសដែលឆ្លងកាត់ការងារច្រើននៅវិទ្យុ កាសែត គេហទំព័រ និងចុងក្រោយនៅទូរទស្សន៍ បានអះអាង ថា ៖«ការងារក្នុងវិស័យសារព័ត៌មាន បានអភិវឌ្ឍចំណេះដឹងខ្ញុំឥតឈប់ឈរ និងបានធ្វើឱ្យខ្ញុំស្គាល់ ពិភពលោកបានច្រើនផងដែរ។

ចំណេះដឹងបានពីវិស័យសារព័ត៌មាន ដែលយើងកំពុងអនុវត្តសព្វថ្ងៃនេះ គឺជាផ្នែកមួយនៃការចូលរួម អភិវឌ្ឍសង្គមជាតិយើង តាមរយៈការរាយការណ៍ព័ត៌មាននានាដល់សាធារណជន»៕