សម្តេចតេជោ ហ៊ុន សែន នាយករដ្ឋមន្ត្រីនៃកម្ពុជា​កាល ពីព្រឹកថ្ងៃទី ៣០ ខែវិច្ឆិកា ឆ្នាំ២០២២នេះ បានបង្ហោះសាររបស់លោកជំទាវ ភឿង សក្កណា រដ្ឋមន្ត្រីក្រសួងវប្បធម៌ និងវិចិត្រសិល្បៈ ជុំវិញការដាក់បញ្ចូល​គុនល្បុក្កតោខ្មែរ ក្នុងបញ្ជីបេតិកភណ្ឌនៃអង្គការយូ​ណេ​ស្កូ។

យោងតាមទំព័រហ្វេសប៊ុកផ្លូវការរបស់សម្តេចតេជោហ៊ុន សែន នាយករដ្ឋមន្ត្រីនៃកម្ពុជាបានបញ្ជាក់ថា សម្តេចបានលើកយកនូវខ្លឹម​សាររបស់លោកជំទាវ ភឿង សក្កណា ដោយបានរៀបរាប់ថា៖«នាងខ្ញុំសូមគោរពជម្រាបជូនសម្តេចមេត្តាជ្រាបថា​ ក្នុងកិច្ចប្រជុំលើកទី​ ១៧​ គណៈកម្មាធិការអន្តររដ្ឋាភិបាលដើម្បីការការពារបេតិកភណ្ឌអរូបី​ នៃអង្គការយូណេស្កូ​ បានគោះញញួរសម្រេចចុះបញ្ជី​ បេតិក​ភណ្ឌអរូបីនៃមនុស្សជាតិ​ ‘’គុនល្បុក្កតោ​‘’ នៅថ្ងៃទី​ ២៩​ ខែ​ វិច្ឆិកា​ឆ្នាំ​ ២០២២​ វេលាម៉ោង​ ១៦:៣១នាទីម៉ោងនៅទីក្រុង​ រ៉ាបាត​ ប្រទេស​ ម៉ារុក​ ត្រូវគ្នានឹងម៉ោង​    ២២:៣១នាទី​ នៅប្រទេសកម្ពុជាយើង»។

ជាមួយគ្នាផងដែរ លោកជំទាវ ភឿង សក្កណា ក៏បានបញ្ជាក់ពីការផ្ញើឯកសារនានា​ រួមទាំងវីដេអូ ផ្ញើមកកាន់ខុទ្ទកាល័យសម្តេចរួចរាល់ដែរ៕ ចិនចាវ