"តាមពិតគឺឯង! ឯងបញ្ជូនមនុស្សមកគំរាមខ្ញុំមែនទេ"

ខណៈដែលលោកពុក យួន ត្រៀមចាត់ការម្តងទៀត សុខៗក៏មានកំណាត់ជូតតុមួយហោះមកធ្លាក់លើក្បាល អូលិវើរ៍ ល្មម ។

"អាថោក! គឺឯងអ្ហេ៎សដែលចង់បោសយកដីម្ដុំនេះ ឯងវាថោកទាប! ចង់កែប្រែដីម្តុំនេះ ចុះ ភីងអាន់ណាយត៍បាសារ៍ ឲ្យធ្វើយ៉ាងម៉េច”

អ៊ំតៅហ៊ូស្អុយ ដើរមកខាងមុខដោយដំណើរពេជ្ឈឃាត ។

ភ្លាមនោះសំឡេងឡូឡាលាន់ឮម្ដងទៀត ។

"អ៊ំប្រុស ខ្ញុំសុំអង្វរ សូមមេត្តាឲ្យខ្ញុំបានជួបនឹង ស៊ែលលី ម្ដងទៅខ្ញុំដឹងថាខ្ញុំមិន...” អូលិវើរ៍ គាំងសម្តី ព្រោះសុខៗក៏មានវែកដែលមិនដឹងមកពីណាហោះឆាសគេ ។

គេងាកយឺតៗទៅមើលជុំវិញខ្លួន មើលក្រុមមនុស្សដែលឈរនៅក្រោយខ្នង អ្នកខ្លះកំពុងមើលគេត្រូវអ្នកភូមិចាត់ការដោយទំពាមាន់បំពងយ៉ាងឆ្ងាញ់មាត់ ខ្លះកាន់ចានទឹកស៊ុបស្ងោរឆ្អឹងជ្រូកថ្នាំចិនមើលគេដែលត្រូវចាប់ក្របួច.កអាវ ខ្លះដៃម្ខាងកាន់មឹក ដៃម្ខាងកាន់កែវទឹកផ្លែឈើ ផឹកស៊ីៗ ព្រមទាំងស្រែកគាំទ្រ...

“ដាក់វាឲ្យងាប់ទៅ”

"អាល្អិត ឯងធ្វើការនៅឯណា ចង់ចាត់ការ ភីងអាន់ យើងអីចឹងឬ ប្រាប់ឯងឱ្យដឹង ស្អែកនេះពួកយើងនឹងទៅចងពួកឯងមួយផ្ទះ... រួមទាំងមនុស្សក្នុងក្រុមហ៊ុនឯងទៀត ពួកយើងនឹងលេងឱ្យពួកឯងរស់នៅមិនសុខ” ម្នាក់ដែលនៅក្រោយខ្នងពុក យួន ស្រែក ។

"ពួកយើងគប់ពងមាន់...មិនទេ ចាំខ្ញុំទៅយកពងមាន់មកគប់"

សំឡេងមនុស្សស្រីឮស្រួយស្រែះ ។

"ហ៊ី! ឯងងាប់មិនខានលើកនេះ ហ៊ានធ្វើបាបដួងចិត្តរបស់ក្រុមគ្រួសារ យួន របស់ពួកយើង ប្រាប់ឯងឲ្យដឹង ពួកយើងឲ្យឯងចូលមកបាន តែមិនលែងឱ្យចេញទៅបានដាច់ខាត!”

ពេលនោះអ្ហែ៎ងក៏មានកម្លោះពីរនាក់ប្រជ្រៀតចូលមក ពេលឃើញ អូលិវើរ៍ ម្នាក់ៗស្រឡាំងកាំងមើលមុខគ្នា ។

"ល្បងធំ?"

"វេស្ទ័រ? ថ័ររី? ហេតុអីពួកឯងមកទីនេះបាន" អូលិវើរ៍ សួរដោយទឹកមុខចម្លែក ។

"ខ្ញុំក៏ចង់ដឹងថាហេតុអីក៏បងមកនៅទីនេះដូចគ្នា "

ថ័ររី ក៏សួរដោយការសង្ស័យ ។

ប្អូនប្រុសទាំងពីរមើលមុខល្បងធំដែលថ្ពាល់សុទ្ធតែស្នាមក្រហមដោយសារត្រូវទះតប់ លើក្បាលមានកំណាត់ជូតតុ...

"ខ្ញុំមកតាមរកស្រីរបស់ខ្ញុំ" វេស្ទ័រ និយាយស្ដីមិនបត់បែន "ចុះអ្នកទាំងពីរ?"

"ដូចគ្នា" អូលិវើរ៍ និង ថ័ររី ឆ្លើយព្រមគ្នា ពួកគេទាំងបីទើបតែដឹងនៅពេលនេះថាពួកគេលង់ស្នេហ៍កូនស្រីផ្ទះតែមួយ ។

សំឡេងហ៊ឺហាឮម្ដងទៀត ចំហាយប្រហារសាយភាយយ៉ាងខ្លាំងចេញពីអ្នកនៅជុំវិញខ្លួន ។

លោកពុក យួន សួរបន្តិចទៀតក៏តភ្ជាប់សាច់រឿងបានដោយភាពឆ្លៀវឆ្លាត គេមានកូនស្រីបីនាក់ ថែមទាំងពេលនេះមានបុរសបីនាក់មកប្រាកដខ្លួននៅទីនេះ នោះគឺប្រែថា...ត្រកូល ឡុង បីនាក់បងប្អូនដល់ថ្នាក់ហ៊ានធ្វើបាបចិត្តកូនស្រីទាំងបីរបស់ខ្លួននៅក្នុងពេលតែមួយទោសៈរបស់លោកពុក យួន ឡើងដល់ចំនុច១០០អង្សាហើយ ។

"ពួកយើង ចាត់ការ" ចប់សំឡេងស្រែករបស់ប្រមុខត្រកូល បណ្ដាអ្នកភូមិក៏លោតសង្គ្រប់ត្រកូល ឡុង បីនាក់បងប្អូន ។

ស្ថានការណ៍នៅពេលនេះចលាចល សំឡេងចេចចាចស្រែកគួរឱ្យខ្លាចបំផុត បីនាក់បងប្អូនត្រកូល ឡុង ត្រូវប្រឈមមុខនឹងការដាក់ទោស ការវាយតប់គប់នឹងរបស់របរគ្រប់ប្រភេទដែលមិនធ្លាប់ជួប មិនថាមកពីម្ចាស់តូប ឬ អ្នកជិតខាង ឬ អ្នកដែលមកចោមមើល។

ថែមទាំងពេលខ្លះឆ្អឹងមាន់ ឆ្អឹងជ្រូក នំ ពងមាន់ រួមទាំងស្ពៃជ្រក់ហោះមកពីគ្រប់ទិស ។

រាត្រីមុនបុណ្យភ្លើងគោមមានទាំងគគ្រឹកគគ្រេងនិងមានក្តីសុខ អ្ហា៎! ចង់សម្លាប់គ្នាឱ្យស្លាប់ហើយ ។

ប្រភពអត្ថបទ៖ OBSOK BOOK