ពិធីករដ៏ល្បី លោក អុឹម ជីវ៉ា បង្ហាញអារម្មណ៍ក្ដៅចិត្តទ្រាំលែងបានបង្ហោះសំណេរមួយក្នុងបណ្ដាញសង្គមព្រលះដោយមិនសំចៃ ទៅកាន់ម្ចាស់ប្រេនមួយដែលមិនទាន់បង្ហាញឈ្មោះកំពុងតែទិញកម្មវិធី Miss Grand មកធ្វើនៅកម្ពុជា ស្របពេលដែលកម្ពុជានិងប្រទេសថៃកំពុងតែមានជម្លោះព្រំដែន បន្ថែមពីនេះអ្នកគ្រប់គ្រងនៃកម្មវិធីមួយនេះ តាណាវ៉ាត ក៏តែងតែប្រមាថមើលងាយមកកាន់កម្ពុជាជារឿយៗ។

នេះបើយោងតាមសំណេររបស់ លោក អុឹម ជីវ៉ា បានបង្ហោះទាំងក្ដៅស្លឹកត្រចៀកបែបនេះថា «អុញ បើកភ្នែកឡើង មានគេប្រាប់ថា អ្នកដែលកាន់ Miss Grand ថ្មី គឺជាម្ចាស់ប្រេនល្បីម្នាក់ ទិញអោយតារាល្បីម្នាក់ជាអ្នកកាន់ តើពិតទេ?? អ្នកណាកាន់មិនសំខាន់ សំខាន់ពេលនេះខ្ញុំចេញមុខការពាររដ្ឋាភិបាលរបស់ខ្ញុំ ដែលត្រូវបាន អាណាវ៉ាត់ ម្ចាស់Miss Grand international ប្រមាថមើលងាយ ហើយបើម្ចាស់ប្រេនល្បីនោះនៅតែ យកម្មវិធីនេះមកទៀត ស្មើរនិងចូលរួមមើលងាយរដ្ឋាភិបាលខ្មែរ ដូចពួកសៀម ដូចគ្នា ។ អ្នកណាក៏ដោយអោយតែកាន់ជើងសៀម ទោះគ្នាឯងក៏មិនយោគយល់ឡើយ ហើយខ្ញុំនៅតែបន្តធ្វើការតវ៉ា រហូតកម្មវិធីនេះលែងមាននៅលើទឹកដីខ្មែរ»។

ក្រោយពីបានឃើញបែបនេះហើយ មហាជនជាច្រើនបានបង្ហាញការគាំទ្រទៅនឹងការលើកឡើងរបស់ លោក អុឹម ជីវ៉ា ព្រមទាំងបានចូលទៅខមិនបញ្ចេញយោបល់តាមការយល់ឃើញរៀងៗខ្លួន និងអន្ទះសារចង់ដឹងថាម្ចាស់ប្រេនរូបណាដែលទិញសិទ្ធកម្មវិធីនេះផងដែរ៕ អត្ថបទដោយ៖ Sun Darasy