មនុស្សជំនាន់មុនតែងតែបង្កើតនូវពាក្យជាលក្ខណៈឃ្លោងឃ្លាដែលមានបង្កប់អត្ថន័យអប់រំដល់មនុស្សជំនាន់ក្រោយ ពាក្យឃ្លោងឃ្លាមានច្រើនណាស់តែក្នុងអត្ថបទនេះខ្ញុំនឹងលើកយកនូវឃ្លោងឃ្លា១​ (បង្កួយនឹងកើតជាស មាសនឹងកើតសំណ ភ្នំមិនកើតថ្ម ស្រីល្អមិនកើតប្តី) មកធ្វើការបកស្រាយជូនដល់បងប្អូនជាអ្នកអានឱ្យបានយល់ដូចតទៅ៖

• បង្កួយនឹងកើតជាស៖ បង្កួយនឹងជាសគឺជាសត្វមានលក្ខណៈស្រដៀងគ្នា ពេលខ្លះពិបាកយល់ថាមួយណាជាបង្កួយ ឬជាសនោះទេ​ បើតាមន័យធៀបលោកចង់សំដៅដល់បុរស នឹងស្រ្តី សព្វថ្ងៃបុរសតែងខ្លួនដូចស្ត្រី ស្រ្តីតែងខ្លួនដូចបុរស បុរសឥលូវមានលក្ខណៈដូចជាស្ត្រីដែរ ទុកសក់វែង, ចុះក្រវិល, លាបឡេ និងម្សៅឱ្យស ចំពោះស្រ្តីវិញក៏មានលក្ខណៈដូចបុរសដែរ ស្លៀកខ្លី,ផឹកស្រា,មានសាក់លើដងខ្លួន,ទុកសក់ខ្លី,ជក់បារីជាដើម គឺច្របូកច្របល់គ្នាអស់ហើយ។

• មាសនឹងកើតសំណ៖ មាសជារបស់មានតម្លៃជាងសំណ តែបែរទៅកើតជាសំណវិញ​ ចំពោះន័យធៀប សំដៅដល់សម្តីមាសរបស់មាតាបិតាដែរអប់រំកូននឹងក្លាយទៅជាសំណសម្រាប់កូនចៅ សព្វថ្ងៃនេះកូនៗភាគច្រើនមិនសូវជាគោរពតាមតំបូន្មានរបស់មាតាបិតាទេ គឺស្តាប់តាមស្រីស្នេហ៍/ប្រុសស្នេហ៍គេច្រើនជាង ដូចនេះសម្តីរបស់មាតាបិតានឹងក្លាយជាគ្នានន័យដូចជាមាសប្រែទៅជាសំណ។

• ភ្នំមិនកើតថ្ម៖ ជាធម្មតាមានភ្នំត្រូវតែមានថ្ម ចំពោះអត្ថន័យអប់រំវិញលោកចង់សំដៅដល់វត្តអារាមអនាគតទៅមានតែវត្ត តែអត់មានព្រះសង្ឃគង់នៅ បងប្អូនជាអ្នកអានអាចសង្កេតបានថា នៅប្រទេសកម្ពុជាយើងសព្វថ្ងៃមានវត្តច្រើនណាស់ តែចំនួនព្រះគឺមានតិចមែនទែន វត្តខ្លះមានព្រះសង្ឃតែ១អង្គ​ក៏មានដែរ នេះហើយជាមូលហេតុដែលពុទ្ធបរិស័ទខំកសាងតែថ្មពេក មិនខំកសាងធនធានព្រះសង្ឃផង ។ លោកអ្នកប្រាជ្ញខាងដើមចង់ដាស់តឿនដល់កូនចៅជំនាន់ក្រោយកុំព្យាយាមកសាងតែវត្តពេក ត្រូវជួយកសាងធនធានព្រះសង្ឃផង ដូចជាជួយបង្កើតសាលារៀន ជួយឧបត្ថម្ភដល់ផ្នែកសិក្សាឱ្យបានច្រើនជាងការកសាងថ្មក្នុងវត្ត។

• ស្រីល្អមិនកើតប្តី៖ ស្រីល្អសំដៅដល់ស្រីដែលពូកែតុបតែងផ្ទះ មិនសូវចេះស្លៀកពាក់លេចលើលេចក្រោម មានសេចក្តីអៀនខ្មាស់មិនហ៊ានស៊ិចស៊ី ខិតខំធ្វើកិច្ចការផ្ទះ សព្វថ្ងៃនេះមនុស្សស្រីដែរមានលក្ខណៈបែបហ្នឹងគឺគេមើលមិនសូវឃើញទេ គឺបុរសភាគច្រើនចូលចិត្តណាស់ស្រីណាស៊ិចស៊ី ស្លៀកពាក់លេចលើលេចក្រោមទៅវិញ។

ទាំងនេះជាអត្ថន័យដែរលោកអ្នកប្រាជ្ញជំនាន់មុនចង់អប់រំកូនចៅជំនាន់ក្រោយឱ្យបានយល់ ខ្ញុំបានសរសេរឡើងដោយភ្ជាប់ជាមួយការយល់ឃើញរបស់ខ្ញុំទៅតាមអត្ថន័យនៃឃ្លោងឃ្លានេះចែកជូនបងប្អូនអ្នកអាន ហេតុនេះបងប្អូនទាំងឡាយគប្បីសិក្សាតាមចំណុចនីមួយៗខាងលើនេះដើម្បីជាប្រយោជន៍ដល់ខ្លួន និងសង្គមជាតិផងដែរ។

អត្ថបទដោយ៖ សាក់ គឹមហ៊ាង

(អត្ថបទចេះចាំតាមការស្តាប់តៗគ្នា និងកែសម្រួលដោយគំនិតផ្ទាល់ខ្លួន)