ក្រុមសង្គ្រោះ ៩១១ ចេញទៅជួយករណី អ្នកទេសចរសង្ស័យជាជនជាតិចិនម្នាក់បាត់ខ្លួននៅលើភ្នំ
យោងតាមព័ត៌មានពីក្រុមជួយសង្គ្រោះ ៩១១ របស់កម្ពុជានៅថ្ងៃទី ១៣ ខែតុលា បានឲ្យដឹងថា ពួកគេទទួលបានការរាយការណ៍ពីប៉ូលីសនៅថ្ងៃទី ១២ ខែតុលា ឆ្នាំ ២០២១ ម៉ោង ១៥៖០០ ថា មានភ្ញៀវទេសចរម្នាក់សង្ស័យជាជនជាតិចិនបានបាត់ខ្លួននៅក្នុងឧទ្យានជាតិភ្នំបូកគោ។
បើតាមការដឹង អ្នកដែលបាត់ខ្លួន និងអ្នកដែលបានរាយការណ៍ទៅប៉ូលីសបានស្គាល់គ្នា ប៉ុន្តែអ្នកដែលបានរាយការណ៍មិនបានដឹងព័ត៌មានច្បាស់ពីជនដែលបាត់ខ្លួននោះទេ។ដោយគ្រាន់តែទទួលបានការហៅឲ្យជួយពីជនដែលបាត់ខ្លួននោះ ដោយប្រាប់ថា បានវង្វេងផ្លូវបន្ទាប់ពីដើរចូលទៅក្នុងភ្នំ។ ក្រោយទទួលបានដំណឹង ពីអ្នករាយការណ៍ ក្រុមសង្គ្រោះក៏បានដៅចំណាំទីតាំងរបស់ជនដែលបាត់ខ្លួន ប៉ុន្តែដោយសារតែទូរស័ព្ទដៃជនរងគ្រោះអស់ថ្ម ពួកគេក្រោយមកក៏មិនអាចទាក់ទងគ្នាបានទៀត។
បន្ទាប់ពីទទួលបានព័ត៌មានពីប៉ូលីស ក្រុមសង្គ្រោះបន្ទាន់លេខ ៩១១ ក៏បានរៀបចំរថយន្តមួយគ្រឿងដឹកមនុស្ស ៦ នាក់ឆ្ពោះទៅកាន់គោលដៅ នៅថ្ងៃទី ១២ វេលាម៉ោង ១៧៖០០ នាទី ដើម្បីជួយសង្គ្រោះ ដោយធ្វើការរុករក និងស្រាវជ្រាវក្នុងបរិវេណចម្ងាយមួយគីឡូម៉ែត្រ។ ទោះបីជាយ៉ាងណាក៏ដោយ ការរុករកមិនបានផល ក្រោយមកក្រុមសង្គ្រោះបន្ទាន់ក៏ចាកចេញនៅវេលាម៉ោង ២០៖៤០ នាទី ដើម្បីសម្រាក។ នៅថ្ងៃទី ១៣ វេលាម៉ោង ៧៖៤០ នាទីព្រឹក ដោយសារតែអាកាសធាតុមិនអំណោយផល ក្រុមសង្គ្រោះបានធ្វើការរុករករហូតដល់ម៉ោង ១១៖២០ នាទីព្រឹកនៅតែមិនឃើញជនរងគ្រោះ។
ដោយសារអាកាសធាតុ និងសណ្ឋានដីធ្វើឲ្យកត្តាហានិភ័យក្នុងការស្វែងរកនៅលើភ្នំបានកើនឡើង ដូចនេះការងារស្រាវជ្រាវ និងជួយសង្គ្រោះត្រូវបានបោះបង់ចោលជាបណ្តោះអាសន្ន រង់ចាំការងារបន្ទាប់។
គួរបញ្ជាក់ថាជនដែលបានបាត់ខ្លួនភេទប្រុស មានអាយុ ២៥ -៣០ ឆ្នាំ (មិនស្គាល់ឈ្មោះ) មានទីលំនៅមិនច្បាស់លាស់ មិនស្គាល់សញ្ជាតិ ប៉ុន្តែសង្ស័យជាជនជាតិចិន៕ អត្ថបទ៖ ទ្រី រ៉ាវី
ណែនាំល្បីៗ
មតិល្បី
សរសេរមតិ