ព្រះសព សម្ដេចក្រុមព្រះ នរោត្តម រណឫទ្ធិ ប្រធានក្រុមឧត្តមប្រឹក្សាផ្ទាល់ព្រះមហាក្សត្រ នៃព្រះរាជា​ណា​ចក្រកម្ពុជា និងជាប្រធានគណបក្សហ្វ៊ុនស៊ិនប៉ិច ត្រូវបានរៀបចំពិធីថ្វាយ​ព្រះភ្លើងរួច​ហើយ នៅថ្ងៃ​ពុធ ទី៨ ខែធ្នូ ឆ្នាំ២០២១នេះ នៅព្រះមេរុ មុខវត្តបុទុមវត្តី រាជធានីភ្នំពេញ។

ពីធីថ្វាយព្រះភ្លើងត្រូវបានរៀបចំធ្វើឡើងដោយអង្គព្រះមហាក្សត្រខ្មែរ ព្រះករុណា ព្រះបាទ សម្តេចព្រះ​បរមនាថ នរោត្តម សីហមុនី បានយាងប្រោសព្រះរាជទានព្រះភ្លើង ក្នុងការបូជាព្រះសព។

ជុំវិញព្រឹត្តិការណ៍នេះ កន្លងមក រាជរដ្ឋាភិបាលកម្ពុជាបានចេញសេចក្តីសម្រេចយក៨ ខែធ្នូ ឆ្នាំ២០២១​នេះ គឺជាថ្ងៃកាន់ព្រះមរណ​ទុក្ខនៅទូទាំងប្រទេស ដើម្បីជាការថ្វាយនូវព្រះកិត្តិយសថ្វាយព្រះអង្គ ចំពោះ​ស្នា​ព្រះហស្ថផ្សេងដែលព្រះអង្គ បានសាងចំពោះជាតិមាតុភូមិ។

រាជរដ្ឋាភិបាលក៏បានបញ្ជាក់ដែរថា ពិធីកាន់ព្រះមរណទុក្ខនេះ ត្រូវកំណត់ឱ្យបង្ហូតទង់ជាតិត្រឹម​កណ្តាល​ដង នៅតាមស្ថាប័នរដ្ឋ និងឯកជន ហាមឃាត់ស្ថានីយវិទ្យុ ទូរទស្សន៍ និងប្រព័ន្ធផ្សព្វផ្សាយដទៃ​ចាក់​កម្មវិធី​កម្សាន្តសប្បាយ។ ក្នុងក្លឹបកម្សាន្ត រង្គសាល ខារ៉ាអូខេ ក៏ត្រូវផ្អាកសកម្មភាពផងដែរ។

កាលពីថ្ងៃម្សិលមិញនេះ សាលារាជធានីក៏បានចេញសេចក្តីជូនដំណឹងមួយផងដែរ ដោយ​បញ្ជាក់​ពី​ការ​បញ្ចៀស​ការកកស្ទះចរាចរណ៍ ចាប់ពីមុខព្រះដំណាក់ តាមរុក្ខវិថី​សម្តេច​ប៉ាន (ផ្លូវលេខ២១៤) ឆ្ពោះ​ទៅ​មហាវិថីព្រះនរោត្តម (ផ្លូវលេខ៤១) បន្តទៅវិមានឯករាជ្យ មហា​វិថី​ព្រះសីហនុ នាគបាញ់ទឹក មហាវិថី​សម្តេច​សុធារស ចាប់ពីម៉ោង៥ ព្រឹក ថ្ងៃទី ៨ ខែធ្នូ ឆ្នាំ២០២១ រហូត​ដល់ពិធីដង្ហែព្រះ​សពត្រូវបានបញ្ចប់​កម្មវិធី។

គួររម្លឹកថា សម្តេចក្រុមព្រះ នរោត្តម រណឫទ្ធិ បានយាងចូលព្រះទិវង្គតនៅថ្ងៃអាទិត្យ ទី២៨ ខែវិច្ឆិកា ឆ្នាំ២០២១ វេលាម៉ោង ៩៖៤០​ព្រឹក នៅប្រទេស​បារាំង ត្រូវនឹងម៉ោង ៣៖៤០នាទីរសៀល ម៉ោងនៅព្រះរាជាណាចក្រកម្ពុជា ក្នុងព្រះជន្មាយុ ៧៧ព្រះ​វស្សា ដោយព្រះរោគាពាធ៕ ដោយ៖ ឃួន លក្ខិណា