ត្រឹមរយៈពេល ៣ថ្ងៃ​ នៃថ្ងៃឆ្លងឆ្នាំថ្មី ឆ្នាំសកល ផ្លូវល្បឿនលឿនភ្នំពេញ-ព្រះសីហនុ មានរថយន្តជាង៨ម៉ឺនគ្រឿងឆ្លងកាត់ ដោយវត្តមានផ្លូវល្បឿនលឿននេះ បានធ្វើឱ្យខេត្តព្រះសីហនុ ក្លាយ​​​ទៅជាទីកន្លែងដ៏ទាក់ទាញសម្រាប់ប្រជាពលរដ្ឋទៅរង់ចាំឆ្លងឆ្នាំ និងដើរលេងកម្សាន្ត​នៅថ្ងៃសម្រាកថ្ងៃឆ្លងឆ្នាំសកល។

យោងតាមប្រសាសន៍របស់ ឯកឧត្ដម លោក ហ៊ាង សុទ្ធាយុត្តិ អគ្គនាយកបច្ចេកវិទ្យា និងទំនាក់ទំនងសាធារណៈ នៃក្រសួង​សា​ធា​រ​ណការ និងដឹកជញ្ជូន និងជាអ្នកនាំពាក្យក្រសួង បានឲ្យដឹងថា ក្នុងថ្ងៃទី៣០ ខែធ្នូ ឆ្នាំ២០២៣ មានយានយន្តឆ្លងកាត់ ២១,៩០០គ្រឿង, ថ្ងៃទី៣១ ខែធ្នូ ឆ្នាំ២០២៣ មានយានយន្តឆ្លងកាត់ចំនួន ២៨,៩០០គ្រឿង និងថ្ងៃទី១ ខែមករា ឆ្នាំ២០​២៤ មានយានយន្តឆ្លងកាត់ចំនួន ៣៣,១០០គ្រឿង ដោយចំនួនយានយន្តឆ្លងកាត់ផ្លូវល្បឿនលឿនភ្នំពេញ-ព្រះសីហនុ ក្នុងឱកាសថ្ងៃឆ្លងឆ្នាំថ្មី ឆ្នាំសកល ឆ្នាំ២០២៤នេះ មានចំនួនច្រើនជាងឆ្នាំ២០២៣។

ចំនួនរថយន្តឆ្លងកាត់ច្រើនបង្កឲ្យចរាចរណ៍លើផ្លូវល្បឿនលឿនក្នុងឱកាសបុណ្យចូលឆ្នាំសកលនេះ មានការកកស្ទះចរា​ចរណ៍នៅតាមបញ្ជរបង់ប្រាក់នៅខេត្តព្រះសីហនុ និងនៅរាជធានីភ្នំពេញ ដោយការកក​ស្ទះ​នេះ មានកត្តាចំនួនពីរ គឺទី១ ម្ចាស់យានយន្តមិនបានប្រើប្រាស់កាត ETC ដែលជា​មធ្យោ​បាយងាយស្រួលសម្រាប់ឆ្លងកាត់បញ្ជរបង់ប្រាក់ ហើយនៅតែបន្តប្រើជម្រើស​បង់​លុយ​នៅនឹងកន្លែង។ កត្តាមួយទៀត ម្ចាស់យានយន្តមួយចំនួនមិនទាន់យល់​ពីការប្រើ​ប្រាស់​គន្លង ETC និងគន្លងបង់ប្រាក់ធម្មតា។ ម្ចាស់យានយន្តខ្លះមិនមានកាត់ ETC នោះ​ទេ តែបែរជាបើកចូលគន្លង ETC ទៅវិញ៕

សម្រួលដោយ៖ Sun Darasy