លោក Arnold Schwarzenegger ដែលជាតារាភាពយន្ដដ៏ល្បីល្បាញ បានបង្ហោះរូបលោក គេងនៅចិញ្ចើមថ្នល់ក្បែររូបសំណាកទង់ដែងរបស់លោក ដោយសរសេរយ៉ាងកំសត់ថា «តើពេលវេលាបានប្រែប្តូរយ៉ាងម៉េចខ្លះ» !

មូលហេតុ នៅពីក្រោយពាក្យមួយឃ្លា និងរូបភាពនេះ គឺចាប់ផ្ដើមដំបូងនៅពេលដែរលោកជាអភិបាលនៃរដ្ឋកាលីហ្វ័រញ៉ា ហើយលោកបានចូលរួមសម្ពោធសណ្ឋាគារមួយ ដែលមានរូបចម្លាក់លោក ខណៈម្ចាស់សណ្ឋានគារបាននិយាយប្រាប់លោកថា «ចាប់ពីពេលនេះទៅ នៅពេលដែលលោកអញ្ជើញមក សណ្ឋាគារយើងនឹងរៀបចំបន្ទប់ជូនលោកជានិច្ច»។ ប៉ុន្ដែក្រោយពេលដែល លោក Arnold ឈប់ធ្វើជាអភិបាលនៃរដ្ឋកាលីហ្វ័រញ៉ា សណ្ឋាគារនោះ បានប្រកែកមិនផ្ដល់បន្ទប់ឱ្យលោកទេ ដោយនិយាយថាលោកត្រូវបង់ប្រាក់ ដើម្បីស្នាក់នៅ ព្រោះមានភ្ញៀវធំៗច្រើនទៀត ដែលត្រូវការបន្ទប់ដែរ។

លោក Arnold ក៏បានយកកម្រាលគេងមកនៅក្រោមរូបចម្លាក់លោក ហើយពន្យល់ពីសារ ដែលលោកចង់បញ្ជូនទៅអោយមនុស្សគ្រាប់គ្នាថា «នៅពេលដែលខ្ញុំមានតួនាទីសំខាន់ ពួកគេតែងមកស្ងើចសរសើរខ្ញុំ ហើយពេលដែលខ្ញុំបាត់បង់តួនាទីនេះ ពួកគេបំភ្លេចខ្ញុំហើយលែងរក្សាពាក្យសន្យារបស់គេ ។ ចូរអ្នកកុំទុកចិត្តលើតួនាទី ចំនួនលុយដែលអ្នកមាន អំណាច ឬលើបញ្ញាញាណរបស់អ្នក ។ ទាំងអស់នេះគ្មានអ្វីស្ថិតស្ថេរទេ» ។

ចូរប្រឹងប្រែងអប់រំអ្នកឯទៀតថា នៅពេលដែលអ្នកជា «មនុស្សសំខាន់» នៅក្នុងក្រសែភ្នែកអ្នកផង អ្នកណាក៏ជា «មិត្ត» របស់អ្នកដែរ ប៉ុន្តែនៅពេលដែលអ្នកលែងមានប្រយោជន៍សម្រាប់គេទៀតហើយនោះ គេលែងខ្វល់ពីរូបអ្នកទៀតហើយ ។ ចំពោះលោក Arnold «អ្វីៗមិនស្ថិតនៅជាអមតៈឡើយ»…។

សម្រួលដោយ៖ រិទ្ធី សុវណ្ណារ័ត្ន