នៅពេលដែលពិធីបុណ្យចូលឆ្នាំថ្មីប្រពៃណីចិន ឆ្នាំរោង កាន់តែខិតជិតចូលមកដល់ ​យើង​កត់​សម្គាល់​ឃើញថា នៅតាមទីផ្សារ តូបលក់ទំនិញនានា ក៏ចាប់ផ្តើមមានការដាក់លក់សម្ភារៈត្រៀមស្វាគមន៍ចូលឆ្នាំថ្មី ប្រពៃណីចិន ខណៈ​ប្រជាពលរដ្ឋ​ខ្មែរ​មួយ​ចំនួន ដែល​មាន​ដើម​កំណើត ឬ​ជាប់​សែ​លោហិត​​ចិន​ពី​ដើម​មក​នោះ ​ក៏បានចាប់ផ្តើម​នាំ​គ្នា​ត្រៀម​លក្ខណៈ​រៀប​ចំ​សម្អាត​ផ្ទះ​សម្បែង និង​ទិញ​សម្ភារៈ​ផ្សេងៗ​ទៀត​សម្រាប់​ពិធី​បុណ្យ​ចូល​ឆ្នាំ​ថ្មី​ ប្រពៃណីចិន។​

នៅឆ្នាំ២០២៤ បុណ្យចូលឆ្នាំថ្មី ប្រពៃណីចិន ឆ្នាំនាគ នៅក្នុងប្រទេសកម្ពុជា ក៏នឹងចាប់ផ្តើមពីថ្ងៃទី៩ រហូតដល់ថ្ងៃទី១២ ខែកុម្ភៈ ដែលឆ្នាំ​នាគ ​ត្រូវ​បានប្រជាជនចិន និងអ្នកជាប់សែស្រឡាយចិនយល់ថាជាឆ្នាំល្អក្នុងការចាប់ផ្តើមរកស៊ី បង្កើតគ្រួសារ ជាឆ្នាំដែលមាន​សក្ដានុពល ព្រោះគេជឿថាសត្វនាគជាសត្វដ៏អស្ចារ្យ មានឥទ្ធិពលដ៏មហិមា ខ្លាំងអស់សត្វទាំងពួង។ មិនតែប៉ុណ្ណោះ គេក៏ជឿថា ការយកកូនក្នុងឆ្នាំរោង ឬឆ្នាំនាគ នេះនឹងជួយលើករាសី ការរកស៊ី បង្កើនលាភ ចូលក្នុងគ្រួសារផងដែរ។

តាមទំនៀមទំលាប់ចិន ពិធីបុណ្យចូលឆ្នាំចិន មានអាយុកាលរាប់សតវត្សរ៍មកហើយ និងរៀបចំធ្វើឡើង ដើម្បីសម្តែងការគោរពដល់ទេវតា និងជីដូនជីតាសាច់សារលោហិត។ វាត្រូវបានប្រារព្ធឡើង នៅក្នុងបណ្តាប្រទេស និងតំបន់មួយចំនួន ដែលសម្បូរជនជាតិចិនរស់នៅ ក្នុងនោះមានដូចជា ចិនដីគោក ហុងកុង ម៉ាកាវ តៃវ៉ាន់ សិង្ហបុរី ថៃ កម្ពុជា ឥណ្ឌូនេស៊ី ហ្វីលីពីន ជប៉ុន វៀតណាម ក៏ដូចជានៅ China Towns ដែលស្ថិតនៅក្នុងបណ្តាប្រទេសមួយចំនួនផ្សេងៗទៀត។ ពិធីបុណ្យនេះ ត្រូវបានគេចាត់ទុកថាជា បុណ្យឈប់សម្រាកដ៏សំខាន់មួយ សម្រាប់ជនជាតិចិន ព្រមទាំងបានជះឥទ្ធិពលមួយផ្នែក ទៅលើវប្បធម៌នៃបណ្តាប្រទេសជិតខាង។

បើក្រឡេកមកមើលពី សកម្មភាពធំៗ៣ ដែលជនជាតិចិន តែងតែធ្វើឡើងជារៀងរាល់ឆ្នាំ នៅពេលមានពិធីបុណ្យចូលឆ្នាំប្រពៃណីចិន៖ ការដុតភ្លើង ដោយក្រដាសសែន មានន័យថា ភ្លើងធ្វើឲ្យសត្វឈ្មោះ «នាន» ដែលតំណាងឲ្យឧបទ្រពចង្រៃមានការភ័យខ្លាច រត់ចេញពីអ្នកភូមិ។ការស្លៀកពាក់ពណ៌ក្រហម បង្ហោះគោមក្រហម និងប្រើប្រាស់របស់របរ ដែលពណ៌ក្រហម ដោយសារតែវាជាប្រពៃណីទាក់ទងនឹងសុភមង្គល សំណាង ទ្រព្យសម្បត្តិ និងលាភសំណាង និងក៏តំណាងឲ្យពណ៌ភ្លើង ដែលធ្វើឲ្យសត្វ «នាន» មានការភ័យខ្លាច បានរត់គេចចេញ។ និងការដុតផាវ ដែលសំដៅលើសំឡេង ផ្ទុះរបស់បំពង់ឫស្សីដែលលោកតានោះបានដុត ធ្វើឲ្យសត្វសាហាវខាងលើភ័យខ្លាច និងរត់គេចបាត់ទៅ។

ហើយអ្វីដែលមិនអាចចោលបាន ក្នុងឱកាសនៃពិធីបុណ្យចូលឆ្នាំចិន របស់ប្រជាជនចិននោះគឺ របាំតោ និងរបាំនាគ ដែលតំណាងឲ្យសត្វមានឫទ្ធានុភាព ឬគេតែងហៅថា របាំម៉ុងសាយ ត្រូវបានគេធ្វើឡើងនៅក្រោយថ្ងៃចូលឆ្នាំ ដើម្បីយកមកបន្លាច និងបណ្តេញឧបទ្រពចង្រៃ ញុំាងកម្មវិធីឲ្យរីករាយ សប្បាយ ជួយឲ្យមានរាសីខ្ពស់ ដែលគេអាចហៅទៅកម្មវិធីសម្ពោធហាង ផ្ទះ ខុនដូ និងពិធីផ្សេងៗទៀតពោលគឺការសម្ដែងអាស្រ័យទៅលើម្ចាស់កម្មវិធីតម្រូវអាចលេងលើដី និងឡើងបង្គោលជាដើម៕