គ្រូបង្វឹកផ្ទាល់ អតីតកីឡាករ ជា ស្រួច គឺលោក អេ ភូថង ថាឈប់ឲ្យឡើងប្រកួតទៀតហើយ
ការវិលត្រឡប់មកកាន់សង្វៀនជាថ្មីរបស់អតីតកីឡាករប្រដាល់ ជា ស្រួច ក្នុងការប្រកួតលើសង្វៀន CNC កាលពីពេលថ្មីៗនេះ មិនទទួលបានលទ្ធផលល្អទេ ដោយកីឡាករវ័យ ៥៣ ឆ្នាំរូបនេះ ត្រូវបានអ្នកប្រដាល់ពេញដោយកម្លាំងរបស់អ៊ីរ៉ង់ Yousef Hematis ម៉ាត់ឱ្យសន្លប់ ហើយហេតុការណ៍សន្លប់នេះបានធ្វើឱ្យលោក អេ ភូថង ជាអតីតកីឡាករប្រដាល់ និងជាគ្រូបង្វឹក មានការបារម្ភខ្លាំង ដោយសម្រេចថាឈប់ឱ្យកីឡាករខាងលើឡើងប្រកួតទៀតហើយ។
ជុំវិញរឿងនេះដែរអតីតកីឡាករប្រដាល់ ជា ស្រួច ក៏មិនបានជំទាស់ទៅនឹងសំណើរបស់លោក អេ ភូថង ក្នុងការឈប់ឱ្យគាត់ឡើងប្រកួតនេះទៀតដែរ ដោយលោកបានឆ្លើយតបបែបនេះថា៖ «ខ្ញុំនឹងធ្វើតាមគាត់ ព្រោះយើងចាស់ហើយ ប៉ុន្តែការឡើងសង្វៀនជាថ្មីនេះ ដោយសារខ្ញុំចង់សាកខ្លួនខ្ញុំទេ ថាតើខ្ញុំអាចវ៉ៃបានឬអត់? តែយើងទៅអត់រួចព្រោះយើងប៉ះគេក្មេង។ ពីដំបូងគេថាយកស៊េរីចាស់ៗ មានសមត្ថភាពល្មមៗមក ប៉ុន្តែកីឡាករអ៊ីរ៉ង់ម្នាក់នេះ នៅក្មេងអាយុត្រឹមជាង២០ឆ្នាំ ចំណែកខ្ញុំអាយុ ៥៣ ឆ្នាំទៅហើយ ប៉ះចំគេមានថ្វីដៃល្អ និងមានទម្ងន់ដៃធ្ងន់ទៀត»។ 
ជាមួយគ្នានេះអតីតកីឡាករប្រដាល់ ជា ស្រួច បានសុំចិត្តអ្នកគាំទ្រយ៉ាងដូច្នេះថា «សូមផ្តាំផ្ញើទៅបងប្អូនទស្សនិកជន ដែលគាំទ្រខ្ញុំតាំងពីដើមមក សូមកុំដៀល កុំជេរខ្ញុំអី ព្រោះខ្ញុំឡើងប្រកួតវិញនេះ គ្រាន់តែចង់សាកមើលបច្ចេកទេសខ្លួនឯងទេ ប៉ុន្តែធ្វើម៉េចបើជួបគេក្មេង ហើយមានថ្វីដៃល្អទៀតនោះ»៕
សម្រួលអត្ថបទដោយ៖ Puthseyha
ណែនាំល្បីៗ
មតិល្បី
សរសេរមតិ