បណ្ដាអ្នកលេងបណ្ដាញសង្គមមានការស្ញប់ស្ញែងយ៉ាងខ្លាំង ខណៈបានឃើញនៅសំណេររបស់អ្នកផលិតមាតិកាកំប្លែងស្ងួត លោកយូរ៉ូ ប្រកាសថាឈប់ទទួលប្រាក់ពីសប្បុរសជនជួយលោកដើម្បីព្យាបាលជំងឺបន្តហើយ ដោយលោកបានសុំចិត្តមហាជនឲ្យងាកទៅជួយក្រុមគ្រួសារដែលជួបគ្រោះថ្នាក់ចរាចរណ៍នៅផ្លូវ ៦០ម៉ែត្រ ដោយប្ដីនិងកូនប្រុសស្រីបានបាត់បង់ជីវិត ចំណែកប្រពន្ធត្រូវសម្រាកព្យាបាលចំណាយថវិកាច្រើន ដែលនេះជាករណីគ្រោះថ្នាក់មួយដល់រន្ធត់សោកសង្រ្គេងយ៉ាងខ្លាំង។

នេះបើយោងតាមការបង្ហោះរបស់អ្នកផលិតមាតិការូបនេះបានប្រកាសថា៖ «សួស្ដីបងប្អូនទាំងអស់គ្នាឥឡូវខ្ញុំបានមកដល់ខ្មែរវិញហើយ ជំងឺរបស់ខ្ញុំស្ថិតនៅក្នុងការតាមដានរបស់គ្រូពេទ្យបីខែទៀតត្រូវឡើងទៅវិញ ដូច្នោះហើយខ្ញុំគិតថាខ្ញុំមិនអីទេខ្ញុំមិនធ្ងន់ធ្ងរទេ ខ្ញុំឃើញបងប្អូនទាំងអស់គ្នានៅតែបន្តបាញ់លុយឲ្យខ្ញុំ ខ្ញុំសុំអត់ទទួលទៀតទេ អរគុណសម្រាប់ទឹកចិត្តបងប្អូនខ្លាំងណាស់ តែបើបងប្អូននៅតែបន្តចង់ជួយខ្ញុំទៀតខ្ញុំសូមឱ្យបងប្អូនទៅជួយក្រុមគ្រួសាររបស់បងស្រីដែលជួបគ្រោះថ្នាក់ចរាចរណ៍ស្លា.ប់ទាំងប្ដីទាំងកូនពីរនាក់ហើយបងស្រីក៏ត្រូវពិការទៀត ចង់ឱ្យបងប្អូនទៅជួយគាត់វិញណា សូមអរគុណដោយក្តីស្រឡាញ់»៕

សម្រួលដោយ៖ Sun Darasy