ទេសចរណ៏ ទឹកឈូ ឬក៏គេច្រើនហៅថា កំពតទឹកឈូ, ជ្រោះទឹកឈូ មានទីតាំងស្ថិតនៅ ភូមិស្នំប្រាំពីរ ឃុំម៉ាក់ប្រាង្គ ស្រុកទឹកឈូ ខេត្តកំពត និងមានចម្ងាយប្រហែល ~10km ពីរង្វង់មូល​ធូរេន។

ទេសចរណ៏ ទឹកឈូស្ថិតនៅក្នុងប្រភេទរមណីយដ្ឋាន ទឹកជ្រោះឬទឹកធ្លាក់ និងទេសចរណ៍ធម្មជាតិ។ សម្រាប់ចំណុចសំខាន់ៗ ក៏ដូចជាភាពទាក់ទាញនៃរមណីយដ្ឋានទេសចរណ៏ ទឹកឈូដែលអាចធ្វើអោយភ្ញៀវទេសចរមានចំណាំអារម្មណ៏នោះ មានដូចជា៖ លេងទឹកឬហែលទឹក, ទស្សនាទេសភាពព្រៃភ្នំ, រៀបចំអាហារដោយខ្លួនឯង, ម្ហូប និងចំណុចផ្សេងៗទៀត។

រមណីយដ្ឋានទឹកឈូ ជារមណីយដ្ឋានដែលមានវ័យចំណាស់ជាងគេបន្ទាប់ពីរមណីយដ្ឋានភ្នំបូកគោ។ រមណីយដ្ឋានទឹកឈូជាតំបន់មានទឹកធ្លាក់ហូរកាត់តាមជ្រលងភ្នំកំចាយ​ទៅតាម​​ព្រែករហូតដល់ទីរួមខេត្តកំពត ដែលជាប្រភពទឹកសាបយ៉ាងសំខាន់ សម្រាប់ផ្គត់ផ្គង់ដល់ការប្រើប្រាស់របស់ប្រជាពលរដ្ឋនៅជុំវិញទីរួមខេត្តកំពតផងដែរ។

ក្រៅពីនោះ យើងក៏អាចគយគន់នូវទេសភាពចម្ការដំណាំហូបផ្លែជាច្រើនមុខរបស់ប្រជាពលរដ្ឋដែលរស់នៅទីនោះនៅអមសងខាងផ្លូវផងដែរ ជាពិសេសចម្ការទុរេន ជាដំណាំដ៏ល្បីល្បាញរបស់ខេត្តមួយនេះ។

រមណី​យដ្ឋា​ន​ទឹកឈូ បានក្លាយ​ជាទី​ពេញនិយម​របស់​ភ្ញៀវទេសចរ ដែល​តែងតែ​ទទួលការសរសើរ​មិន​ដាច់​ពី​មាត់ ចំពោះ​សម្រស់​ទឹក​ហូរ​ថ្លា​ឈ្វេង។​ រមណី​យដ្ឋា​ន​ទឹកឈូ មាន​ខ្ស​ល់​ត្រជាក់​បរិសុទ្ធ និង​មាន​ភ្នំ​តូច ភ្នំ​ធំ ព័ទ្ធជុំវិញថែមទៀតផង។

ភ្ញៀវ​ទេសចរ​ជាតិ និង​អន្តរជាតិអាចធ្វើ​ដំណើរ​ចេញ​ពី​ផ្សារ​សាមគ្គី​ខេត្ត​កំពត​ ទៅ​ស្ពាន​ព្រែក​កំពត​ឆ្លង​កាត់​ស្ពាន​បន្តិច​បត់​ស្តាំ​ទៅ​ត្រង់​ប្រមាណ​ជា​៨គីឡូ​ម៉ែត្រ ពេល​នោះ​នឹង​ប្រទះ​ភ្នែក​ឃើញ​រមណីយដ្ឋាន ទឹកឈូជាមិនខានឡើយ។

សម្រាប់ការធ្វើដំណើរដើម្បីទៅដល់ទីតាំងនៃរមណីយដ្ឋានទេសចរណ៏ ទឹកឈូ ភ្ញៀវទេសចរមានភាពងាយស្រួល ពីព្រោះមិនមានការធ្វើដំណើរថ្មើរជើង និងធ្វើដំណើរឆ្លងទឹក រឺក៏ជិះទូកឡើយ។ ចំពោះចំណតរថយន្តវិញ ភ្ញៀវទេសចរអាចធ្វើការចតដោយផ្ទាល់នៅរមណីយដ្ឋានបានថែមទៀតផង។

សម្រាប់កន្លែងអង្គុយលំហែរកាយវិញ រមណីយដ្ឋានទេសចរណ៏ ទឹកឈូ គឺមានខ្យូសអង្គុយ រឺក៏តូបអង្គុយជាច្រើនសម្រាប់ភ្ញៀវទេសចរ ហើយក៏មានសេវាកម្មទទួលកម្មង់អាហារផ្ទាល់ពីទីនោះផងដែរ។ លើសពីនេះទៅទៀត រមណីយដ្ឋានទេសចរណ៏ ទឹកឈូមានកន្លែងកម្មង់អាហារ រឺកន្លែងលក់អាហារ, មានអាហារដ្ឋាន និងមានភោជនីយដ្ឋានទៀតផង។

សម្រាប់កន្លែងស្នាក់នៅ រមណីយដ្ឋានទេសចរណ៏ ទឹកឈូមានផ្ទះសំណាក់ និងមានសណ្ឋាគារ ប៉ុន្តែសម្រាប់បឹងហ្គាឡូពុំទាន់មានឡើយទេ។